2 Kings 15

U-Azariya iNkosi YakoJuda

1Ngomnyaka wamatshumi amabili lesikhombisa kaJerobhowami inkosi yako-Israyeli, u-Azariya indodana ka-Amaziya inkosi yakoJuda waqalisa ukubusa.

2Wayeleminyaka elitshumi lesithupha yokuzalwa esiba yinkosi, njalo wabusa eJerusalema okweminyaka engamatshumi amahlanu lambili. Ibizo likanina lalinguJekholiya; evela eJerusalema. 3Wenza ukulunga phambi kukaJehova, njengalokhu okwakwenziwe nguyise u-Amaziya. 4Kodwa izindawo zokukhonzela, azidilizwanga; abantu baqhubeka benikela imihlatshelo kanye lokutshisela imphepha kuzo.

5UJehova wehlisela inkosi u-Azariya ubulephero eyabugula yaze yafa, njalo yayihlala yodwa endlini yayo. UJothamu indodana yakhe wayegcina isigodlo senkosi, ephethe labantu belizwe.

6Ezinye izehlakalo ngombuso ka-Azariya, lakho konke akwenzayo, akulotshwanga yini egwalweni lwembali yamakhosi akoJuda na? 7UAzariya wafa walala kuboyise njalo wangcwatshwa phansi kwabo eMzini kaDavida. UJothamu indodana yakhe wathatha ubukhosi.

UZekhariya iNkosi Yako-Israyeli

8Ngomnyaka wamatshumi amathathu leminyaka efica mibili ka-Azariya inkosi yako-Juda, uZekhariya indodana kaJerobhowami waba yinkosi yako-Israyeli eSamariya, njalo wabusa okwezinyanga eziyisithupha. 9Wenza okubi phambi kukaJehova, njengalokho okwakwenziwe ngoyise. Kazange atshiye izono zikaJerobhowami indodana kaNebathi, yena owabangela ukuba u-Israyeli azenze.

10UShalumi indodana kaJabheshi wenza amacebo okususa uZekhariya wamhlasela phambi kwabantu, wambulala wahle wathatha ubukhosi waba yinkosi. 11Ezinye izehlakalo ngombuso kaZekhariya zilotshwe egwalweni lwembali yombuso wamakhosi ako-Israyeli.

12Ngakho kwagcwaliseka ilizwi likaJehova kuJehu elathi: “Abendlu yakho bazabusa u-Israyeli kuze kube yisizukulwane sesine.”

UShalumi Inkosi Yako-Israyeli

13UShalumi indodana kaJabheshi waba yinkosi ngomnyaka wamatshumi amathathu lesifica munye ka-Uziya inkosi yakoJuda, yena wabusa eSamariya okwenyanga eyodwa.

14Ngakho uMenahemu indodana kaGadi wehla esuka eThiriza esiya eSamariya. Wahlasela uShalumi indodana kaJabheshi eSamariya, wambulala wasethatha ubukhosi.

15Ezinye izehlakalo ngombuso kaShalumi, lamacebo okuhlamuka lawokukhokhela kwakhe, kulotshiwe egwalweni lwembali yamakhosi ako-Israyeli.

16Ngalesosikhathi uMenahemu, wathi esuka eThiriza wahlasela uThifisa laye wonke umuntu owafunyanwa esedolobheni lababeseduzane lalo, ngoba bala ukuvula amasango abo. Wasuka uThifisa waqhaqha wonke amanina ayezithwele.

UMenahemu iNkosi yako-Israyeli

17Ngomnyaka wamatshumi amathathu laficamunye ka-Azariya inkosi yakoJuda, uMenahemu indodana kaGadi waba yinkosi yako-Israyeli, wabusa eSamariya okweminyaka elitshumi. 18Wenza okubi phambi kukaJehova. Ekubuseni kwakhe konke kazange atshiyane lezono zikaJerobhowami indodana kaNebathi, ayebangele ukuba u-Israyeli azenze.

19Ngakho uPhuli inkosi yase-Asiriya wahlasela ilizwe, njalo uMenahemu wamnika amathalenta esiliva ayinkulungwane ukuze azuze ukusekelwa lokuqinisa umbuso wakhe.

20UMenahemu wathelisa bonke abako-Israyeli. Wonke umuntu onothileyo kwakumele athele ngamashekeli esiliva angamatshumi amahlanu ukuze aphiwe inkosi yase-Asiriya. Ngakho inkosi yase-Asiriya yasuka elizweni, ayizange ibe isahlala khona.

21Ezinye izehlakalo ngombuso kaMenahemu, lakho konke akwenzayo, akulotshwanga yini egwalweni lwembali yamakhosi ako-Israyeli na? 22UMenahemu waya ekuphumuleni kubokhokho bakhe. UPhekhahiya indodana yakhe yathatha ubukhosi.

UPhekhahiya iNkosi Yako-Israyeli

23Ngomnyaka wamatshumi amahlanu ka-Azariya inkosi yakoJuda, uPhekhahiya indodana kaMenahemu waba yinkosi yako-Israyeli eSamariya, yena wabusa okweminyaka emibili. 24UPhekhahiya wenza okubi phambi kukaJehova. Kazange atshiyane lezono zikaJerobhowami indodana kaNebathi, ayebangele u-Israyeli ukuba azenze. 25Omunye wezikhulu zakhe, uPhekha indodana kaRemaliya wabumba amacebo okumsusa. Wathatha amadoda angamatshumi amahlanu aseGileyadi, wayabulala uPhekhahiya, kanye lo-Arigobi lo-Ariye enqabeni yesigodlo eSamariya. Ngakho uPhekha wabulala uPhekhahiya njalo wahle wathatha ubukhosi.

26Ezinye izehlakalo ngombuso kaPhekhahiya, lakho konke akwenzayo, kulotshiwe egwalweni lwembali yamakhosi ako-Israyeli.

UPhekha iNkosi Yako-Israyeli

27Ngomnyaka wamatshumi amahlanu lambili ka-Azariya inkosi yakoJuda, uPhekha indodana kaRemaliya waba yinkosi yako-Israyeli eSamariya, njalo wabusa okweminyaka engamatshumi amabili. 28Wenza okubi phambi kukaJehova. Kazange atshiyane lezono zikaJerobhowami indodana kaNebathi, ayebangele ukuthi u-Israyeli azenze.

29Ngezinsuku zikaPhekha inkosi yako-Israyeli, uTigilathi Phileseri inkosi yase-Asiriya weza wathumba i-Ijoni, le-Abeli Bhethi Mayakha, leJanoya, leKhedeshi kanye leHazori. Wathumba iGileyadi kanye leGalile, kubalwa lelizwe lonke likaNafthali njalo waxotshela abantu e-Asiriya. 30Ngakho uHosheya indodana ka-Ela wenza amacebo okususa uPhekha indodana kaRemaliya. Wamhlasela wambulala, wasethatha umbuso waba yinkosi ngomnyaka wamatshumi amabili kaJothamu indodana ka-Uziya.

31Ezinye izehlakalo ngombuso kaPhekha, lakho konke akwenzayo, akulotshwanga egwalweni lwembali yamakhosi ako-Israyeli na?

UJothamu iNkosi YakoJuda

32Ngomnyaka wesibili kaPhekha indodana kaRemaliya inkosi yako-Israyeli, uJothamu indodana ka-Uziya inkosi yakoJuda waqalisa ukubusa. 33Waba yinkosi eleminyaka engamatshumi amabili lanhlanu ubudala bakhe, njalo wabusa eJerusalema okweminyaka elitshumi lesithupha. Ibizo likanina kwakunguJerusha indodakazi kaZadoki.

34Wenza okulungileyo phambi kukaJehova, njengalokho okwakwenziwe nguyise u-Uziya.

35Kodwa izindawo zokukhonzela kazisuswanga; abantu baqhubeka benikela imihlatshelo lokutshisa impepha khonale. UJothamu wavuselela iSango laNgaphezulu lethempeli likaJehova.

36Ezinye izehlakalo ngombuso kaJothamu, kanye lakwenzayo, akulotshwanga egwalweni lwembali yamakhosi akoJuda na?

37(Ngalezozinsuku uJehova waqala ukuthuma uRezini inkosi yase-Aramu kanye loPhekha indodana kaRemaliya ukumelana loJuda.)

38UJothamu waya ekuphumuleni kubokhokho bakhe wangcwatshwa labo eMzini kaDavida, okwakulidolobho likayise. U-Ahazi indodana yakhe wathatha ubukhosi.